＊本台語長篇小說獲國家文藝基金會創作補助＊
大港嘴 (04)之三
上險的是陣頭內面閣有一个自稱反抗到底的固執份子叫做王一鏢﹐伊無認為這个陣頭ka-nā欲保護王爺公niâ﹐應該無惜性命保護大港嘴毋才tio̍h。王一鏢主張﹐就愛親像較早的林大貓仝款﹐對無天無地的官廳發動奇襲﹐所致﹐當位島北落南的消息ká-ná暗頭á的草báng飛來崁tī大港嘴的時﹐王一鏢喝講：就是晉﹐做伙來共阿山演倒啦！彼个khut勢外呢仔親像廟口賣膏藥的拳頭師leh。伊隨人á隨人問﹐行到李碌的面頭前﹐kā李碌的衫á領揪leh講:「阿你leh？」二蕾目睭tèⁿ kah親像二粒荔枝核gîn-ooⁿh-ooⁿh掛tī頭殼額á﹐閣ká-ná底共恥笑。Hín﹐李碌捷捷感覺著伊的一切tī海湧lìn搖搖hián-hián﹐有時tī湧的這頭﹐有時tī湧的彼頭──阿你leh？An-ne的問題就親像大海tī伊的面前liah--開﹐成做一个深坑﹐予伊hāⁿ袂過──哼哼我﹐林大貓的後代﹐當然嘛是一个「反抗者」﹐毋過﹐毋是你這款有膽無腦的跤數﹐kán！可惜遮的話﹐伊無大聲講出來﹐就親像嚨喉予王一鏢彼二粒荔枝核的目睭that-tiâu-leh﹐受氣佮見笑ká-ná一陣ka-sàu溢tī胸坎
──到底匿tī厝內的林大貓是啥物心情矣？聽人講﹐來探路草的日本巡佐離開了後﹐林大貓知影in日本人的態度可能底改變矣﹐就共家己關tī一間用來kik酒的地陷跤a﹐交代下跤手tshûan三頓﹐閣共阿猴官廳開予伊的投降條件准許書tē 佇身邊。李碌才想著﹐伊所感覺著的彼个深坑﹐定著嘛bat佇伊這个無見過面的外查甫祖的面前出現﹐人稱阿猴一猛的林大貓……聽講伊尾後無離開﹐就死佇地陷跤a﹐死的時﹐手lìn閣共彼張投降條件准許書gîm稠稠﹐阿彼張投降條件准許書予血kō澹去﹐反烏﹐就袂輸一塊已經lih起來的糊藥
──Kám成實是驚死的血矣？
風吹過柴十字架的時﹐雅各牧師佮伊的老母仝款無法度應伊。
「雅各牧師﹐你看應該按怎做才好？雖罔我想欲tháu一口喟﹐我毋佮王一鏢徛做伙﹐hit款穩死的決心無彩人﹐我做袂到。」
「囡仔﹐你愛知影﹐真正的反抗﹐嘛毋是taⁿ靠氣魄就有夠的。」
「無leh？」
「閣愛靈巧滑溜ká-ná一尾蛇。」
「哦！」
王一鏢將手放開的時﹐李碌搖頭表示伊無意願﹐按呢﹐笑聲隨就親像白蟻sô入伊的耳仔。王一鏢講：「無彩這个林大貓的外曾á孫﹐李á碌﹐穿裙的！」笑聲就tân起來。
──哼！有勇無謀的m̄-tsiâⁿ跤數！有一日﹐我會予你知影啥物號做正港的查甫kiáⁿ！
「假使你成實是我的阿pa﹐你kám通共我講﹐按怎你欲按呢為非sám做？」
「我無矣﹐你攏是聽啥人講的？」
「遮逐个人攏按呢講嘛！」
「Tsheh！He是因為逐个人攏予怹買收去矣﹐怹欲共你洗腦﹐佮彼个姓宋的仝款﹐講恁pē的歹話﹐乾焦想欲侮辱咱niâ-niâ。我的phah拚﹐一切攏是為著地方﹐為著予咱大港嘴袂予外人若大海吞去！」
「阿姓宋的到底想欲創啥？」
「伊用買田買塭á的名義收刮土地﹐準備欲起塑膠工廠。縣政府的官員嘛攏予伊買去矣。」
「按呢欲按怎？」
「憨kiáⁿ﹐佮怹拚落去矣欲按怎！」
「蝶[vi]﹐這是我提出勇氣才寫予妳的批﹐因為我沓沓á沓沓á清醒過來﹐才知影﹐過去以來﹐我一直底叫阿老爸老爸的彼個人﹐並毋是我的老爸﹐m-nā按呢﹐甚至位某一个角度來講﹐伊﹐煞是我真實的老爸的冤仇人。當我瞭解這項﹐我隨就發現我已經死去矣﹐我乾焦會使喝講﹐我欲走揣我真正的老爸﹐m-ko講起來可笑﹐he﹐不過是一个藉口﹐實在講﹐我表面的走揣只是實際的走閃niâ-niâ﹐我欲離開某一个我無佮意的所在﹐行對某一个我的性命中心上根本的所在﹐按呢﹐我就沓沓á沓沓á轉來佇遮。這馬﹐我愈來愈確定矣﹐我bat行過這條路﹐就算親像是愛lǹg過一條閣深閣長的暗溝á﹐這條路予我的心肝頭是愈來愈定著矣。我恬恬坐佇港嘴的埠岸邊﹐聽著真濟代誌﹐嘛牽挽著真濟暗sàm的感情﹐雄雄﹐我的頭殼就浮出一个人影﹐he是我自細漢就鬥陣的一个佮我仝款無出脫的朋友某物人﹐咱共叫做K好啦﹐我愈想愈mî-tsiⁿ﹐所以就決定將K的故事寫落來共妳講……妳一定會問我怎樣是妳？其實妳毋免緊張﹐我無其他的意思；毋過﹐就親像咱的人生會有足濟自然的選擇﹐當我想著K﹐妳的畫面嘛做伙出現﹐按呢﹐我就真自然接受這个安排矣﹐我願意接受這个安排﹐就親像我願意接受我性命中所拄過的一寡離奇的命運仝款。
若講著K﹐我就想著伊的kha-me-ra:烏色的機械頭前phok一粒鏡頭﹐ká-ná查某囡仔的大蕾目睭﹐除了玻璃的部份﹐機身佮鏡筒一切鐵質的外表攏生sian lak漆﹐袂輸予人生暗流的槍尾刀凌治過﹐K認定這是伊成做一个kha-me-ra主人的驕傲。彼暝伊的kha-me-ra險予人tàn入水溝﹐就佇港市市政府後壁的金都戲園的後尾門。我相信妳知影彼間戲園﹐是像妳這款查某囡á無可能到位的戲園﹐甚至當妳共伊貓pì-pà四界生菇的壁頂懸所貼的露體海報看一眼就會感覺受著侮辱彼款的戲園。
......待續
Plurk
FaceBook
Twitter
MyShare
顯示內嵌語法
