「輪椅美工師」助傷健人士走出社區活出真我

自強協會義工潘漢能本身擁有機械工程碩士學歷，一直努力讀書欲考取機械工程師資格，一心在工作上大展拳腳，惜一次手術令阿能需終身靠輪椅代步。

「中二嘅時候跌親個頭，搞到個頭同手腳不受控咁郁，但一直都相安無事，點知有次醫生話個頭搖得太犀利，傷咗條頸椎，做完手術之後，自此要坐輪椅！」

由工程公司經理頓變成終身須坐輪椅的傷健人士，不難想像阿能的心情何等低落。雖事隔多年，阿能重提往事，仍眼泛淚光。「社會地位、收入、朋友圈子都變晒，都幾唔開心！」

一展所長　成就無限可能

然而，傷健人士雖行動不便，但只要得到合適的配套及支援，個人才能絕不遜於肢體健全者。

自阿能加入自強協會擔任義工後，漸漸由低谷走出來，現時更善用其機械工程知識幫助其他傷健人士，「例如電動輪椅電池成五、六千蚊一舊，我可以同佢哋分享點樣叉電叉得有技巧，延長舊電嘅壽命。」另一邊廂，阿能亦是該機構「輪椅美工師」服務受惠者之一，「就算保養得幾好，電動輪椅要維修保養都好貴，落雨嘅時候輪椅控制器好容易入水，入咗水會短路，但輪椅美工師嘅縫紉服務就幫我整咗個防水袋，好實用，依家落雨出街都唔駛驚，慳返筆維修費！」

而「輪椅美工師」服務另一受惠者嘉星更坦言，輪椅就等如雙腿，服務可以令他衝破肢體傷殘的障礙，擺脫以往封閉的自己，走出社區鼓勵同路人發掘自己更多的「可能性」。
 

跨越坐輪椅的障礙  幫助同路人

「自強協會中心主任吳恩兒認為，傷健人士比一般健全人士更能開解彼此，同路人身份讓義工們更能以同理心關愛他人，透過自身經歷幫助自己，成就他人。吳呼籲大眾踴躍捐款支持「輪椅美工師」服務，讓此項有意義的計劃得以延續下去，「雖然我哋用人哋唔要嘅輪椅去拆件，攞返啲零件翻新再用，但基本營運開支、水、電、租金、維修保養都需要錢，希望大家支持呢班自強嘅傷健朋友！」

網址出處：https://www.hk01.com/%E7%A4%BE%E5%8D%80%E5%B0%88%E9%A1%8C/282420/01%E5%BF%83%E6%84%8F%E6%85%88%E5%96%84%E9%A0%85%E7%9B%AE-%E8%BC%AA%E6%A4%85%E7%BE%8E%E5%B7%A5%E5%B8%AB-%E5%8A%A9%E5%82%B7%E5%81%A5%E4%BA%BA%E5%A3%AB%E8%B5%B0%E5%87%BA%E7%A4%BE%E5%8D%80%E6%B4%BB%E5%87%BA%E7%9C%9F%E6%88%91