多樣語言的文學價值─台灣文學獨立聯盟電子報─智邦公益電子報
enews.url.com.tw · June 22,2011Catherine Yen ─ An unsopken world
我不願再被糾纏
如果地球被創造
當生命不在
何處是天堂
能量與熱情都是說謊者
I don't want to be tangled
If the earth is to be created,
No more, the human life
Where is the paradise
Energy and passion are liers
......網路閱讀
陳秋白 ─ 心內樹
心內樹
─木麻黃
密密密密密密密密密密
喌喌喌喌喌喌喌喌喌喌
喌喌喌喌喌喌喌喌喌喌
佇我囡仔時的海岸
暝日聽海的喝[huah]叫
大做一欉一欉啼哭的樹
看著叫袂轉的土地
落落一撮一撮
篩過風的頭毛
佇星光疏疏的暗暝
當我崎踮伊的身邊
伊篩過月光的頭毛
像一枝一枝的針，像雨
沃落啁啁吼叫的岫[siū]
─水筆仔
親愛的
共咱每一工
湧起湧落
纓纏，懷胎的紅嬰仔
像一枝筆
拋落你鬆軟的腹肚頂
用風的手勢
挽一蕊一蕊日頭光
鉼[pín]踮青春的額頭
晟養
一欉一欉有身樹
當滿月的海潮淹過你
拄生根閣幼茈的身軀
鹹澀的鹽窒滿你的喙
時間佇爛塗水底浮沈
佇暴浪絞滾的岸靠底
離塗飄浮的身軀相絞
沈底閣重新生根發葉
佇風吹雨淋的
每一刻
生湠河口的記
憶
─斑 芝
上媠[suí]的樹木
褪落青衫
化做一片寒人的天
初夜冷風
點著[to̍h]滿天烽火
這是你受洗的日子：
十七世紀
一欉柑仔紅的攀枝花
發現閣佔領
是啥人的英雄樹？
擔袂牢月色的花蕊
吐露一絲一絲無耐的聲說
逫[tòe]飄流的雲
寫做一張一張 失蹤的批
─聖誕樹
顯顯[hiánn-hiánn]的伯利恆星光
降落牧羊人的曠野
對一个散赤庄跤囡仔的手
交予一个作穡人的手
〈叮叮噹，叮叮噹〉
對一个查埔囡仔的手
交予一个查某囡仔的手
〈叮叮噹，叮叮噹〉
啥人歡喜，迎接，祈禱
一欉純白的樹
一片搖落星的天
閃爍火光的遠方
暗暗悲傷的燈火
對一个失明阿媽的面
傳予一个驚惶母親的面
少女伊的目睭含著向望
〈叮叮噹，叮叮噹〉
啥人的子佮情人著傷，失蹤，死亡
血佇土地堅焦
堅焦的土地佇囡仔的襪仔底碎鹽鹽
─松 梧
行入你
暗暗澹濕
響亮的雷拍斷的身軀
外頭的聲說講：
……你已經死矣！
我攑頭：
……遮爾深的井。
你的身軀底
湠著青苔，蟲豸[thâng-thuā] ……
我慢慢牽長的喙鬚
旋入窗外發酵的白霧
……拖袂牢彼隻駛行的船……
─榕 仔[tshîng-á]
彼欉囡仔時的榕仔
佇廟埕揣阮tshit迌
有時伊行去溪邊，徛踮田岸
佮風走相逐[tsáu-sio-jiok]
佮厝鳥仔覕相揣[bih-sio-tshuē]
金黃色的日頭光掖落伊的頭頂
愈褫[thí]愈開的枝葉：
覕一岫一岫的鳥仔子
孵一蕊一蕊的夢
暗頭仔的榕仔跤
上驚伊的喙鬚根來幔阮的肩胛
賰[tshun]大人的椅條，喙角全波的古
佮煽動的葵扇
彼欉囡仔時的榕仔
佇我的窗前隱隱現現
你會看著：
一隻狗佇大樹公湠開的烏影底哺著骨頭
......網路閱讀
邱一帆 ─ 離開妳，做得留下麼个分妳
離開妳，做得留下麼个分妳
離開妳
離開妳
ngai做得留下麼个分妳
分妳愐一生人
該日暗晡
風合水送來
鋪天蓋地个土石流
堆成一村塚埔
ngai在底下
還吂來得掣
打一通電話
傳一則簡訊分妳
風水个底下有ngai
胡長松 ─ 台語長篇小說《大港嘴》連載
＊本台語長篇小說獲國家文藝基金會創作補助＊
大港嘴 (05)之四
「蝶﹐這是一个寂寞的故事。巴斯卡講﹐咱人的存在﹐佇無限的大佮無限的細之間漂浮﹐走揣伊的歸宿。這是K共我講的。K袂當理解的是﹐是按怎伊hiah呢自然就佮金都彼陣『毋成人』kâⁿ 纏做伙﹐就親像怹自細漢就是鬥陣的。K閣較袂當理解的是﹐按怎怹頭家娘阿鳳姊會佇彼暝加入怹的kiáu攤﹐搏猶袂煞﹐就閣愛伊陪去踅街買衫。K拄去金都就感覺著阿鳳姊看伊的奇怪的目神﹐閣有hia兄弟佇滾笑的時講過的熱siâu話。『閣較濟水嘛飼彼隻紅蝦蛄袂飽。』『是按怎講紅蝦蛄？』『嘿嘿等你予sut著就知矣！』彼一暝﹐遮熱siâu話一直佇K的頭殼轉踅。伊佮阿鳳姊行入一个地下的商場﹐是佇城市的河邊共烏暗的嘴thí ka̍h大大大的商場﹐親像深入佇土底的腹內﹐有一切想會著的iau-sò數想的膽汁。怹行過樓梯邊仔四界倒lìn-lìn的乞食﹐行過規暗kù-tsāi人吐酒的臭酸喟的壁角﹐嘛行過予人噴漆噴ka̍h花貓貓的生sian的鐵捲門。查甫查某相攬leh行﹐K感受著一種非道德的崩敗感﹐這个崩敗感遂予伊原始的數想裸露、漲大起來。暗sàm--nih﹐『紅蝦蛄』的想像that佇伊的胸仔。K懷疑阿鳳姊是刁意故siâⁿ伊的。伊發見阿鳳雖罔毋是青春少女﹐毋過嘛毋是一个無姿色的查某人﹐三十幾歲的少婦身軀有一種siâⁿ人的飽滇感。伊一直注意著伊厚嘴唇頂na蜜的胭脂﹐閣有特別用睫毛膏妝過的長閣翹的目睫毛。伊買幾lo袋衫﹐唉重﹐要K共鬥kūaⁿ轉去厝。結果一入門﹐阿鳳就揪伊的手講:『恁頭家無佇厝﹐坐一下啦！這幾su新衫我換來予你鑑定看覓！』
『阿頭家敢會雄雄轉來？』
『袂啦！你放心啦！』
阿鳳講『你放心啦』的口氣﹐表示伊真清楚K的掛慮﹐而且伊一講出嘴﹐怹二个人本底佇心肝內暗暗仔想的劇情就佇頭殼內浮花出破﹐偷討的暗示共K猶停留佇慢熟的性衝動刺激ka̍h活lìng-lìng--起來。阿鳳姊行入房間﹐過一下仔位內面喝聲﹐喊K入去看。
K一行入房間﹐著鼻著一tsūn查某人的芳氣罩來。
阿鳳姊共K攬leh﹐毋過﹐K擔頭看著壁頂懸掛一張怹尪仔某的相片﹐可能是罪惡感﹐伊位伊的頭家的面雄雄聯想著過去一个叫做蘭的查某囡仔的面﹐才一目睨﹐拄才激起來的喟雄雄就消散去。阿鳳姊乾焦穿一su火紅的紗質內衫﹐看起來是對性真ta-tiú的夠熟水的查某人﹐毋過佇怹尪仔某的相片下面﹐K感覺著一種恐怖的氣氛ká-ná烏布mua過來。
K共伊講：『失禮﹐我猶是無法度！』
『是按怎？毋免驚歹勢啊﹐K弟。我袂叫你負責的。』
『毋是啦。妳誤會我的意思矣﹐阿鳳姊。我的意思是講﹐我對查某人一向無趣味。我是……』
竟然要用白賊話來掩崁性的無奈﹐K因為見笑發面紅﹐規个頷頸燒滾滾。講家己是同性戀就袂歹勢矣﹐這是K單純的想法。毋過﹐K並毋是gâu講白賊的人﹐伊的白賊話隨就予阿鳳姊出破。查某人笑二聲﹐看伊﹐倚近伊﹐共伊的褲頭tháu開﹐手婆伸入去輕輕仔貼佇伊軟去的鳥頂懸。伊感覺一tsūn涼共伊的鳥溫柔包崁起來。閣親像有電流的箭位伊的手婆射入鳥的內面﹐鑽上心肝。K因為查某人的溫柔激動起來﹐流出真失志的目屎。目屎一下手順嘴phúe流落來﹐滴佇阿鳳姐靠倚的肩胛頭頂懸。
查某人擔頭講：『K弟﹐你白賊﹐伊閣hia呢燒loh neh！敢講毋是親像拄才勇壯gâu飛的鳥啊？』
『阿鳳姊﹐無法度啦﹐我tō……』
『莫失意啊﹐K弟﹐治這我是專門的neh﹐你交予我就好﹐伊小等就會大漢﹐成做一隻gâu飛的鳥矣。』
蘭的面佇K的頭殼內親像浸著福馬林藥劑phòng起來﹐予K一種想欲吐的感覺。
海湧佇沙埔á的跤步輕輕á搬屣。
K雄雄想起蘭是K拄離開厝彼暫佇海墘遇著的查某囡仔。是hia呢單純青春的面啊。一起先K用身世的故事吸引伊(或者﹐位K後來的理解﹐欺騙伊)少女的同情﹐按呢﹐怹就鬥陣矣。伊路尾才知影蘭是有錢人兜的查某子﹐自從讀專科一年就開始逃課逃家﹐佮K相遇的時已經半年無轉去厝矣。有一工蘭講：『我這馬乾焦想欲做予你歡喜的代誌﹐因為這个世界乾焦你了解我。』窮實講K並無了解伊﹐自從彼工伊第一擺獻身予K﹐怹就綿精佇對方青春焦燥的身軀。暝日乾焦守佇K臭酸的眠床頂﹐ki-ki-kūaiⁿ- kūaiⁿ﹐ká-ná欲死晉前無停底交尾的田嬰。按呢﹐直直到某一工盈暗﹐蘭雄雄吼起來﹐用衰弱的口氣問伊：『活咧到底為啥？愛到底是啥？』K搖頭﹐只有共ân-ân攬抱。K回想﹐彼是彼二隻田嬰最後的交尾的畫面﹐毋過伊無智覺著蘭的危機。蘭目睭半瞌﹐伊身軀狂熱的高潮親像ngeh仔共K ngeh咧﹐吼聲一tsūn一tsūn來﹐『莫停止啊﹐K！』K感覺胸仔口有一塊悲傷的烏影底漲大﹐佇一波過一波的湧裡一直忍耐﹐最尾後﹐怹佇對方的吐氣內面停歇。蘭講：『K﹐你對我真好。』K共伊金滑攏是汗的身驅攬leh﹐跋入佇疲勞的夢裡無法度應伊﹐彼塊悲傷的烏影重重teh佇伊的夢尚深的所在﹐伊規暝佇烏影下面滾絞……
K偃頭講：『我第二工透早佇水聲中醒來﹐蘭已經自殺無喟矣。吃一把安眠藥﹐浸佇làu水的浴缸內面。伊佇水裡的面phòng起來……』
『毋過K弟﹐聽起來伊的死並毋是你的責任啊！』
『毋是責任的問題。假使我若關心伊﹐伊就袂死矣。毋過我位頭到尾乾焦貪伊的身體niâ。連警察仔嘛用對待色情狂的眼光看我……』
......網路閱讀
柯柏榮 ─ 來買彩券哦！
來買彩券哦！
──足肢殘障者
透中晝的日頭，將輪椅的輦仔烘出痕
一仙倒勼的身影，一箱五花彩券的下跤
兩節焦痡的蓮藕腿
「來買彩券哦──」
予赤火炰甲出油的身命
將日頭背佇尻脊骿
悲慘的目睭洩漏姑情的光影
西裝褲、套裙的跤跡，來回徙走
連頓蹬一下都遐涸頭
紅紅的心碰著冷冷的寒流
「來買彩券哦──」
無疑悟雷公雄雄拍一聲咳啾
雲越疊越厚，雨越落越粗
原本閒sian7-sian7 的跤腿，走甲親像煏鼓箸
人 kheh人的空縫伸出一支痟貪的手蹄
捙倒輪椅搙一搣彩券閃入去巷仔底
輪椅吭跤翹，彩券滿天飛
予目屎豉甲莦聲的孤影佇塗跤爬
頭毛鬖鬖面色白死殺
喙仔開開嚨喉淹水喝無聲
一支一支密密的喙唇鋪青苔
冷支支的目睭猶原冷支支
焦痡的蓮藕腿，拖出兩畷淺淺血路
路的盡磅，荏荏彈出一聲交懍恂
「來買──彩──券──」
註：
1.炰（pu5）：烘烤。
2.姑情（koo-tsiann5）：懇求。
3.頓蹬（tun3-tenn）：停頓、猶豫。
4.遐（hiah）：那麼。
5.涸頭：吝嗇。涸（khok）。
6.閒sian7-sian7：閒得很。
7.煏鼓箸：形容逃跑得很慌張。煏（piak）。
8.搙一搣：抓一把。搙〈lak8〉，搣（me）。
9.吭跤翹：向後跌倒。吭（khong7）。
10.鬖鬖（sam3-sam3）：形容頭髮散亂。
11.畷（tsua7）：行。
12.交懍恂（ka-lun2-sun2）：因冷或驚嚇而顫抖。
......網路閱讀
