關於本報

台灣文學獨立聯盟電子報
報主:台灣文學獨立聯盟
創刊日期:2009-06-29
發報頻率:週刊
訂閱人數:213
官網:

近期電子報


訂閱便利貼


將貼紙語法置入您的網站或部落格當中, 訪客可以輸入mail取得認證信,並按下確認連結後, 快速訂閱您的報紙。
預覽圖
訂閱台灣文學獨立聯盟電子報報
台灣文學獨立聯盟電子報
-----------------------------------------------------------------------------------------------------
Plurk FaceBook Twitter 收進你的MyShare個人書籤 MyShare
  顯示內嵌語法

台灣文學獨立聯盟電子報
發報時間: 2010-02-10 05:00:00 / 報主:台灣文學藝術獨立聯盟
本期目錄
「火煉的水晶」二二八台語文學展策展前言
陳寧貴 ─ 詩想起----老屋家/ 簑衣
張德本 ─ 阿立祖匿佇梅花鹿的斑紋中轉來
Lim Jukhai ─ Chhàn-lān Ji̍t-thâu kha 燦爛日頭腳
胡長松 ─ 生態的文學,文學的生態
《文學客家》創刊號出版
[公益聯播]102年最新活動大事曆
「火煉的水晶」二二八台語文學展策展前言

「火煉的水晶」二二八台語文學展策展前言


「火煉的水晶」
二二八台語文學展策展前言



  佇台灣,少數的外來侵略者佮殖民者總是用優勢政權的刀、銃佮重稅等等手段,對付原本就佇這塊島嶼生湠的本土族群,閣將台灣佮的政治、經濟、文化牽纏做伙,這種情形佇台灣的歷史一直咧重複。遮的外來侵略佮殖民者,就是荷蘭、明鄭、滿清、日本以及佇1945年無故侵佔台灣的中國國民黨政權佮軍隊。徛佇侵略佮殖民者的對立面來看,台灣1947年的二二八事件並毋是「偶發」的,而是一直咧重複的悲劇的「必然」。四百年來,台灣佇這个「必然」的重複的悲劇內面,一直咧流血,台灣人的精神,嘛一直咧火煉。

  1947228日,是一般台灣民間所指中華民國流亡政府的中國國民黨政權,對台灣人民佮少數當時綴中國國民黨政權來台的新住民的二二八屠殺的開始日。同時,中華民國流亡政府也以這个事件為藉口,由1949519日開始,對台灣人民執行長到38年,世界上久的一黨獨裁戒嚴佮白色恐怖統治,剝奪誠濟台灣人民回國攬抱家己土地的權力佮建立新國家的向望。

  依照台灣予人殖民的歷史慣例來看,每一遍新的外來殖民統治者到位,攏會共前一个外來統治政權的跟綴者,歸入台灣人族群來對付。1947年的二二八事件,是台灣人對外來中國國民黨政權佮軍隊的反抗。當然,經過62年,中國國民黨政權、軍隊佮的跟綴者,今馬佇台灣已經有一定的政治、經濟佮文化影響實力。因為按呢,這群人當然毋知予人殖民統治的滋味。毋過猶是愛知影,一旦未來有新的統治者到位,62年前發生佇台灣人身上的悲劇,並袂放煞,仝款愛予人當做眼中刺,予人挽落來剁!了解二二八事件佮伊代表的意義,對現此時台灣每一个族群未來的命運來講,攏是真要緊的代誌,各族群的知識份子愛發揮道德良知,共娶領族群歷史命運的責任擔起來。

  有人講,若無二二八屠殺事件,台灣人就無追求獨立建國的想法。毋過換一種思考方式,就是中華民國流亡政府的中國國民黨政權,當時透過美國接管台灣,若無本島地方士紳鼓舞人民去迎接佇中國敗戰的中國國民黨政權,佮接管後進行的統一思想教育,按呢台灣人民是毋是就會浮現選擇建立新國家的想法佮意志!

  四百冬來,經過血統透濫的台灣民族,基本上是對部落社會進入予殖民主義者連紲統治的階段,長期予人殖民的結果,造成台灣人民普遍存在忍受屈辱佮順從的民族性。這種長期殖民外力的作用,其實已經弱化台灣人民自我獨立建國意願表達的能力,甚至毋知民族自決早就是一種普世價值。因為按呢,台灣人民佇真無意識的狀態,繼續接受中華民國流亡政府的中國國民黨政權的獨裁統治,毋過這種猶無自覺的無意識狀態,煞予一部份人誤認「若無二二八屠殺事件,台灣人就無追求獨立建國的想法。」

  二二八的受難者,絕大多數攏是講台語的台灣人,只有用台語才有法度深刻重現受難的聲音。為著欲連接台灣民族受難的聲音佮反抗的精神,咱特別邀請22位台灣詩人作家的台語文學作品參展,編印這本二二八台語文學展《火煉的水晶》。水晶透明真純,親像台灣人的本質,水晶真濟切面,若像每篇參展的作品各別呈現整個事件無仝的面向,有受難者的特寫、有事件的現場、嘛有撫慰受難者的安魂曲。透過現代詩佮小說的筆法,記錄二二八屠殺事件,重建台灣民族心靈創傷的文學冊。文學無法度平反歷史,也無法度洗清冤屈,毋過文學會使顯影台灣這塊清翠水晶染血的痕跡,會使予台灣民族的後代瞭解過去,堅心建國的理念佮意志。

  受難若是代表一个民族靈魂的火煉,咱台灣民族久長的傷痕,就會昇華,永遠深刻佇水晶光炫的面容。
                         

              台灣文學藝術獨立聯盟 謹識
                                                              2010. 1. 5







陳寧貴 ─ 詩想起----老屋家/ 簑衣


老屋家


一間盡舊介老屋
既經分毋知哪來介野草包圍霸佔
屋頂分歲月打出一個大孔
蓋像老屋巴大嘴佇介緊呻 ﹝tsen﹞

老屋介主人搬走盡久
幾下代人佇屋肚搞聊介聲音
半夜時節
蓋像還有細細聲傳入耳公

一陣涼風吹過來
係毋係
過身介老主人歸來繞老屋麼?




簑衣


牆頭項
掛等一身阿公著過介
老簑衣

春雷打擊過
夏雨清洗過
秋風搓揉過
冬月割傷過

今下係
掛佇我心肝肚介
一項新心事



......網路閱讀



張德本 ─ 阿立祖匿佇梅花鹿的斑紋中轉來


阿立祖匿佇梅花鹿的斑紋中轉來


阿立祖!
匿佇梅花鹿的斑紋中轉來
生者無人發覺

鹿皮捌予藉口
荷蘭人向西拉雅租借共款大小的土地
狡詐的利剪鉸皮條圍佔普羅民遮熱蘭遮城

鹿骨予人焢膠
陶鍋內阿立祖靈嗞嗞噗噗
滋補所有侵佔者精血氣神的橫暴

鹿肉予人曝乾
牽手的腱肌變脯
痛苦深懸藏佇博物館是真少人讀有的新港文書

鹿鞭予人浸泡
藥酒發作漢人上愛的壯陽史
敗腎心虛掩崁洩精佇平埔查某祖腹肚頂的痕跡

鹿影中梅花閃熠消失
福爾摩沙草原曠野消失
西拉雅的眼神捌看過做伙消失

四百年後恆春半島天雲藍白
綠野復育的梅花鹿
予記憶重現編號予歷史反省追蹤

皮 骨 肉 鞭
被捕掠分屍過的鹿魂敢會當
赦免幼鹿又閣被屠殺的宿命?
梅花斑紋潔白敢會當復育歷史圍觀者心中一絲仔平和?

誰剉海岸的水筆仔挖林投的根?
鋸斷開紅聖花的莿桐斬倒結木棉子的斑芝?
莿桐花開甲紅葩葩
是咧暗示平埔即愛流紅汞汞的血?
木棉子嗶開幼棉仔一絲絲白雪雪四散飛
是咧預言平埔即愛開始冗冗長的流亡?

血跡!遷移有外遠血跡即拖外遠
囚禁!阿祖囚禁阿公囚禁老父囚禁掠會著的查埔人
亡命!一代二代三代……十代二十代……
屠殺!死閣生閣刣閣死閣生閣刣閣死……
斷裂!斷尫姨曲裂老君酐
滅族!匿入去逼咱上粗殘的漢族血池中偷生
竄改!兜一个潘一个金一个郭做漢姓莫閣叫咱做「番」著好

盜賊被認做父母
以國為名
實在是人世間的恥辱
誰以恥辱為名袂感覺恥辱?

阮的傷痕是用恁的言語會當哭出聲的嗎?
從來毋捌佇部落隔瞑竟然敢講部落的星夜!
從來毋捌夯過弓、槍竟然敢講打獵的瞄準!
從來毋捌見過羌、鹿竟然敢臆伊逃走的速度!
毋捌攬過岩石咁知影誓言的重量?
毋捌爬上山稜欲安怎感受龍骨的承擔?

恁總是用文化村來消滅阮的文化
用保留囚禁阮的跤手 用禁獵來盜獵
用禁伐來濫伐 用禁建來違建
啥人敢閣用優雅的漢字記錄阮即欲消失的母語

在島嶼 山脈 綠野 田園 故鄉 佔領 割讓
種作 分配 毀壞 出賣 放捨 贖身裏

所有毋知的攏是自然
所知影的一絲仔攏是意外

斬剉掉的頭殼恬恬
溪埔頂砂坪的粒粒西瓜
瓜藤交纏四界萱的冤魂
溪頭深山烏雲罩頂
暴雨沖拼的歷史
流向消失記憶的海洋

海水有外鹹目屎即有外鹹
海峽有外深怨氣即有外深
田土有外厚流血即有外厚
高山有外懸壓迫即有外懸

鹽是咱民族久長被曝的結晶
苦是鹽的根源 苦是鹽的底柢
鹹是咱的命
醯今年按算明年的吃食
醯頂代的屈辱映望後代的出頭
鹽是民族留過血汗的種籽
種籽發分杈的樟樹
樹椏大小支手骨隨在人斬剉榨煉
隨在人甲污暗剝削提煉做潔白的樟腦
無見血甲咱頭殼心的白腦髓抽出來
永遠甲咱當作縮乾的焦粕擲捨
出賣咱憨直的潔白
換做帝國貪腐的紋銀

種籽發出稻穗反種或則變穗?

外來種的福壽螺像腫瘤
惡性繁殖佇田底圳溝
台灣田螺即欲滅種?

外來種的布袋蓮像病癌
惡性繁殖佇溪池埤潭
台灣水萍即欲滅種?

外來種的北京話像蜈蜞
惡性繁殖似日月同出
台灣話即欲滅種?

血脈流動Siraiya續家己毋知Siraiya西拉雅
喘氣呼吸Hoanya續家己毋知Hoanya洪雅
頭毛發出Poavosa續家己毋知Poavosa巴布薩
毛管開闔Vupuran續家己毋知Vupuran巴布拉
目睭匿藏Pazzehe續家己毋知Pazzehe巴宰海
指甲發長Taokas續家己毋知Taokas道卡斯
雙跤行踏Ketagalan續家己毋知Ketagalan凱達格蘭
雙手振動Kavarawan續家己毋知Kavarawan噶瑪蘭

阿立祖!
匿佇梅花鹿的斑紋中返來
生者無人發覺



......網路閱讀



Lim Jukhai ─ Chhàn-lān Ji̍t-thâu kha 燦爛日頭腳


Chhàn-lān Ji̍t-thâu kha 燦爛日頭腳


Bān-tūn sio-lō ê ji̍t-thâu kha
Chhàn-lān kim-n̂g ná kiâⁿ khoaⁿ-khoaⁿ~sī
Chhiūⁿ n̂g-kim sî-tāi
Kàu chia lâi, téng-koe mā chhìn-chhī
Chit tiâu lāu koe-lō͘
Chín lóng hong-siaⁿ

Lí chai--bô?
Tio̍h he Gô͘-ho̍k-tiàm keh-piah saⁿ-kak-thang
Lóng lu hìⁿ-sak ah
Tē-ki-chú ū chhìn-chhái pài chi̍t jiah o͘-o͘

Ū--bô? Kó͘-chá chhioh-jī-chng khí--ê
Khì-phài hó-sin-sè
Tiâⁿ-táu koh pîⁿ-tháⁿ
Chiàⁿ-thiaⁿ mn̂g-chhùi thâu-chêng
Êng--sî, Lán lóng teh hia
Thiaⁿ khek-pôaⁿ “Koan-á-niá chi lôan”
Tiâⁿ-bóe gín-á lin-long se̍h
Sńg chhiⁿ-âng-teng, am-ko̍k-ke
Ī kim-chu-á, pò-chhù, koh-ū “sa-tau”
Lō͘-bóe
Lóng tī hia la-thian ha-tê khòaⁿ thiⁿ-chhiⁿ

Bóe-ah, ta̍uh-ta̍uh-á to̍h kan-na chhun
Ū-iáⁿ khah iú-hàu--ê
Rajio ta̍k-ji̍t pàng-phōaⁿ saⁿ pôe
Liâm-chîⁿ liâu-liâu-á khih-khiah
Chhù-piah ûn-ûn-á pang khi
Tōa tiâⁿ-táu chi̍t jiah chi̍t jiah o͘-o͘ âng-âng

Bô gōa-kú
Poaⁿ khì óa kiáⁿ liáu-āu
Îⁿ-thiāu chiù pāi
Liân thiaⁿ-thâu kha mā am chháu
Bô-lâng koh káⁿ kiâⁿ-kha-kàu
Taⁿ, lóng bô khòaiⁿ ah, Lóng lu hìⁿ-sak ah
Tio̍h hit-ji̍t Gio̍k-soaⁿ pe̍h-thâu

Heⁿh lah, in tau--bô, sin hòan-á-chhù hia lah
"Bōe kòan-sì, ā bô-lâng thang kóng-ōe" chia̍p-chia̍p teh tâu--bô
Mn̂g-sìⁿ-pang chín m̄-sī tah chi̍t tiuⁿ
Chhiò-âng chhiò-âng ê chû-chè
"Hó sí neh, ún-ū sio hó-hiuⁿ"
Hit ji̍t mā-sī chhàn-lān ê ji̍t-thâu
Hoe-kho͘ thòe-sek thòe-sek chhiò-thian chhiò-thian
Hong-siaⁿ hiu-hiu-háu

Khah chá a
Chhàn-lān ji̍t-thâu kha
Kiáⁿ-jî sī-sòe ê chhiò-iông
Kū koe-chhī ê hôan-hôa ìn-sióng
Lāu pêng-iú tàu-tīn chhun-hong
Chi̍t hāng chi̍t hāng àm-àm-á bô--khì
Toh chi̍t hāng tāi-seng
Kì-tî iah-sī hāng-mi̍h
Siáng ū châi-tiāu pîn-thâu kóng

Āu--lāi, Chhut-mn̂g tio̍h chē lián-í
Tú-tio̍h-á, Tú tī lō͘-piⁿ
Chit nn̄g gê cha-bó͘ sun-á
Kò͘ in ka-kī kóng-ōe
Bóe-im ná in ê ba̍k-chiah-mn̂g khin khiàu
Ū-sî chhiò ū-sî khàu
Poh-tiāⁿ teh kóng in tau ê iù-kiáⁿ
Ta̍k-lâng bô tiuⁿ-tî
Ba̍k-bóe liâm-liâm sio-sio ngiau-ngiau
Hē kāng-khóan sī chhàn-lān ji̍t-thâu

Hiông-hiông
“Ná khàu ná chhiò, āu piàn kiō
Khng khì pàng-sái kah pàng jiō”
Tio̍h sī án-ni
Chhàn-lān ji̍t-thâu tōa kah



......網路閱讀



胡長松 ─ 生態的文學,文學的生態


【台文戰線第17期 編輯室筆記】

 
生態的文學,文學的生態


國際性的氣候變遷高峰會這個月佇哥本哈根召開,會議主要討論減碳目標,希望各國接續《京都議定書》的精神,會使有新一步的國際共識,毋管最後的結果佮過程的國際政治算盤互相按怎拍,這背後有一个尚基本的意義就是,生態已經是牽涉著人類生命敢會使延續落去的一个無法度避免的問題,而且愈來愈緊急,咱愛共地球位咱家己的手裡搶救轉來。咱嘛會使發見生態的問題根底,時常有政治、歷史、殖民的因素咧牽纏。

佇哥本哈根氣候變遷高峰會前的11月21日,台灣嘛有一个重要的會議佇國立台灣文學館召開,就是台文筆會的成立大會。這個筆會成立的過程,筆者佇這期的一篇文章內面有筆記落來,毋過佇遮對比來論的,是這个會議的精神之一,就是欲團結各界所有台文作家的力量,共台語位殖民者的手裡(甚至位已經異化的家己族群的人的手裡)搶救轉來。母語/母語文學是土地族群文化的具體面,台語的死活當然嘛是嚴肅、緊急的議題。

生態的議題牽涉的是咱身體的活命,母語/母語文學的議題牽涉的是咱靈魂的活命,二項攏真重要。

今年,鄭福田文教基金會舉辦生態文學獎,設台語詩組,按呢的計畫,實在是兼顧咱的身體佮靈魂的活命的真好的代誌,筆者真感佩這款的想法,確實,生態毋是干焦鄭氏基金會背後的太陽能產業愛關心的議題爾,閣較應該是全民的議題,是台語文學家的議題。這是生態的文學,值得咱致重。

另外一方面,咱攏知影,生態體系咧討論生產者佮消費者,生態的問題,濟濟是位尚高層的消費者(人類)無底止剝削低層的生產者所產生的;消費者的生命倚靠生產者,毋過,生產者會使生湠的肥底,suah予消費者過度的欲望糟蹋去,進一步造成消費者本身生命的危機──佇台語文學敢毋是按呢?咱愛斟酌:敢有對實踐、生產台語文學無經驗抑是無誠意的人,當坐佇生態懸層,大範大範咧消費長年參加實踐的台語文學生產者,教示人按怎寫台語按怎用字等等?這是本刊欲提出的非常嚴肅的問題。這是文學的生態,仝款值得咱致重。

所致,鄭福田生態文學獎得獎名單公佈了後,台語詩人陳秋白先生所聲明的拒絕入選公開批,佮陸續佇網路、本刊佮其他刊物發表的議論,我想,就會使佇文學生態這个角度刺激逐家來思考。文學的生態,體現佇各文學獎、文學補助的評審人選、過程、運作制度等等,對台語文學發展的方向,有一定的影響,所有第一線的台語文學「生產者」,袂使欠這款自覺。

《台文戰線》本期所推出的「第一屆鄭福田生態文學獎拒選落選詩展」作品,攏是最後無選入佇得獎作品的詩作,囥佇遮展出,一方面是為著予有意思比較台語「生態的文學」的朋友得著較全面、正確的圖像(該獎得獎作品集已經出版,有興趣者嘛會使佮主辦單位連絡);以筆者的眼光來看,遮的作品咧討論的,已經毋干焦是生態現象的表面,濟濟是針對台灣生態問題背後的殖民歷史這个生態的病根的批判,無全面來讀,對讀者是真可惜的代誌。筆者嘛欲提醒,造成這个台灣生態問題的殖民者佮造成台灣母語流失的殖民者,是仝一群人,阿到今一直毋放棄北京語殖民官話寫作的人(甚至濟濟自稱本土派文學人士),既然看袂清楚,寫作的事實猶是毋願棄絕佮殖民者仝條水,早慢,攏愛面對這个殖民文學生態的歷史。當然,這个專輯嘛是欲提醒所有台語文學的「生產者」:毋管得獎無得獎,台語敢閣有向望,台語文學的逐枝草枝欲按怎佇家己的田園生湠,只有倚靠家己拍拚長,毋是倚靠高層的「消費者」敢欲消費你。

咱做伙加油!

2009/12 佇內惟



......網路閱讀




《文學客家》創刊號出版


《文學客家》創刊號出版



主 編:邱一帆
tu6986@webmail.mlc.edu.tw
社 址:台灣台北縣新莊市民安西路245巷10弄9號
電 話:(02)2203-5124 FAX:(02)2205-1828.
郵政劃撥:帳號16686525 黃子堯帳戶
hakka_taiwa@yahoo.com.tw
I S B N 978-986-83804-2-4 (平裝)定 價:新台幣140元.



推薦訂閱
東非Safari‧旅中隨帖 + 皇家可本哈根繽紛隔熱杯&Ole系列,週年慶限時特惠!@【《Yilan美食生活玩家》】
【最新消息】萌,新青年運動-國家理想&青年論壇燭光晚會@【台灣生態學會電子報】
轉寄『多樣語言的文學價值』這期電子報

寄信人暱稱  寄信人email
收信人暱稱  收信人email

  • 社群留言
  • 留言報主